ઇન્ડોનેશિયામાં મુસાફરોથી ભરેલી બોટમાં આગ લાગી

સુરાબયાથી મકાસ્સાર જતી ફેરીમાં ભીષણ આગમાં પાંચ લોકોના મોત

જકાર્તા: ઇન્ડોનેશિયાના સમુદ્રમાં સુરાબયાથી મકાસ્સાર તરફ જઈ રહેલી બેસોએક્યોતેર મુસાફરોથી ભરેલી એક ફેરીમાં અચાનક ભીષણ આગ ફાટી નીકળતા મોટો દરિયાઈ અકસ્માત સર્જાયો હતો, જેમાં પાંચ લોકોના મોત નીપજ્યા છે અને એકતાળીસ લોકો હજુ પણ ગુમ હોવાનું સામે આવ્યું છે.

નેશનલ સર્ચ એન્ડ રેસ્ક્યુ એજન્સીના ડેટા મુજબ, આ ફેરીમાં કુલ બેસોએક્યોતેર મુસાફરો અને ક્રૂ સભ્યો સવાર હતા, જેમાંથી બચાવ ટુકડીએ બેસોપચ્ચીસ લોકોને સુરક્ષિત રીતે બહાર કાવામાં સફળતા મેળવી છે. સુરાબયા સર્ચ એન્ડ રેસ્ક્યુ ઓફિસના વડાના જણાવ્યા અનુસાર, ઘટનાની જાણ થતાં જ અનેક નજીકના જહાજો તાત્કાલિક બચાવ કામગીરીમાં જોડાઈ ગયા હતા અને સમુદ્રમાં કૂદી પડેલા મુસાફરોના જીવ બચાવ્યા હતા.

આ જહાજ પૂર્વ જાવાના ઇન્ડોનેશિયાના બીજા સૌથી મોટા શહેર સુરાબયાથી દક્ષિણ સુલાવેસીના મકાસ્સાર તરફ પ્રવાસ કરી રહ્યું હતું ત્યારે આ દુર્ઘટના ઘટી હતી. ઘટનાસ્થળના સોશિયલ મીડિયા પર વાઇરલ થયેલા વીડિયોમાં ફેરીના ઉપલા ડેક પરથી જાડા કાળા ધુમાડાના ગોટેગોટા નીકળતા અને આગ ફેલાતી સ્પષ્ટ જોઈ શકાય છે, જ્યાં જીવ બચાવવા માટે લાઈફ જેકેટ પહેરેલા મુસાફરો જહાજની એક બાજુએ એકઠા થઈને દરિયામાં છલાંગ લગાવી રહ્યા હતા.

રાહત અને સતત તપાસ અભિયાન

આ ભીષણ દુર્ઘટના બાદ રાહત અને બચાવ કામગીરી પૂરજોશમાં ચાલી રહી છે. બચાવ જહાજો સતત ઘટનાસ્થળે તૈનાત રહીને ગુમ થયેલા એકતાળીસ લોકોની શોધખોળ કરી રહ્યા છે. ખરાબ પરિસ્થિતિ વચ્ચે પણ પ્રશાસન દ્વારા તમામ સંભવિત પ્રયાસો કરવામાં આવી રહ્યા છે જેથી બાકીના તમામ મુસાફરોને સુરક્ષિત શોધી શકાય.