ભારતના રાજદૂત નવીન શ્રીવાસ્તવે નેપાળના વડાપ્રધાન બલેન્દ્ર શાહની મુલાકાત લીધી

કાઠમંડુ : નેપાળમાં ભારતના રાજદૂત નવીન શ્રીવાસ્તવે સોમવારે નેપાળના વડાપ્રધાન બલેન્દ્ર શાહ સાથે મુલાકાત કરી હતી. માર્ચમાં વડાપ્રધાન પદ સંભાળ્યા બાદ શાહ સાથે કોઈ વિદેશી રાજદૂતની આ પ્રથમ વ્યક્તિગત મુલાકાત છે. આ મુલાકાત સાથે વડાપ્રધાન શાહે વિદેશી રાજદૂતો સાથે સીધી અને વન-ટુ-વન કૂટનીતિક વાતચીતની શરૂઆત કરી છે.

લગભગ એક કલાક ચાલેલી આ મુલાકાત દરમિયાન બંને પક્ષોએ ભારત-નેપાળ સંબંધોના વિવિધ પાસાં અંગે ચર્ચા કરી હતી. તેમાં દ્વિપક્ષીય મિત્રતા, પરસ્પર હિતો, વિકાસ ભાગીદારી અને ચાલી રહેલા સહયોગ જેવા મુદ્દાઓ મુખ્ય રહ્યા હતા.

ભારતીય રાજદૂત નવીન શ્રીવાસ્તવે વડાપ્રધાન શાહને શુભેચ્છા પાઠવી અને ભારત-નેપાળના દ્વિપક્ષીય સંબંધોને વધુ મજબૂત બનાવવાની ભારતની પ્રતિબદ્ધતા વ્યક્ત કરી હતી. જવાબમાં વડાપ્રધાન શાહે બંને પડોશી દેશો વચ્ચેના ઐતિહાસિક સંબંધોને વધુ ગાઢ બનાવવાની જરૂરિયાત પર ભાર મૂક્યો હતો. સાથે જ તેમણે પરસ્પર હિતના ક્ષેત્રોમાં સાથે મળીને કામ કરવાના મહત્વને પણ રેખાંકિત કર્યું હતું.

વડાપ્રધાન બન્યા બાદ શાહ અત્યાર સુધી વિદેશી રાજદૂતો સાથે એકલાં મળવાનું ટાળતા હતા અને સામાન્ય રીતે સમૂહ બેઠકોને પ્રાથમિકતા આપતા હતા. નવીન શ્રીવાસ્તવ સાથેની આ મુલાકાત તેમની પ્રથમ વ્યક્તિગત દ્વિપક્ષીય રાજદ્વારી બેઠક બની છે.

શ્રીવાસ્તવ સાથેની મુલાકાત બાદ શાહ આજે ચીનના રાજદૂત ઝાંગ માઓમિંગ સાથે પણ વન-ટુ-વન બેઠક કરશે. ત્યારબાદ મંગળવારે અમેરિકાના ચાર્જ ડી’અફેર્સ સ્કોટ અર્બોમ સાથે મુલાકાત યોજાવાની છે. વડાપ્રધાનના નજીકના સૂત્રોના જણાવ્યા અનુસાર, આ ઉચ્ચસ્તરીય રાજદ્વારી બેઠકોની તૈયારીઓ કેટલાક અઠવાડિયા પહેલાં જ પૂર્ણ કરી લેવામાં આવી હતી, પરંતુ સુનસરીમાં તાજેતરની ઘટનાઓને પગલે તેમાં થોડો વિલંબ થયો હતો.

ભારત નેપાળના સૌથી મોટા અને મહત્વપૂર્ણ વિકાસ ભાગીદારોમાંનું એક છે. નેપાળમાં આધુનિક માળખાકીય વિકાસ માટે ભારત-નેપાળ સહયોગની શરૂઆત 1951માં કાઠમંડુના ગૌચર એરપોર્ટના નિર્માણથી થઈ હતી, જે 1954માં પૂર્ણ થયું હતું. 1954માં નેપાળમાં ભારતના વિકાસલક્ષી પ્રોજેક્ટ્સના સંકલન માટે ઇન્ડિયન એઇડ મિશનની પણ સ્થાપના કરવામાં આવી હતી.

છેલ્લા સાત દાયકામાં ભારત-નેપાળ વિકાસ સહયોગનો વ્યાપ સતત વધ્યો છે. આરોગ્ય, શિક્ષણ, વીજળી, પુરાતત્વ, કનેક્ટિવિટી, વેપાર, કૃષિ, સાંસ્કૃતિક વારસાના સંરક્ષણ અને ક્ષમતાનિર્માણ સહિત અનેક ક્ષેત્રોમાં બંને દેશો વચ્ચે સહયોગ ચાલી રહ્યો છે. આ પ્રોજેક્ટ્સ નેપાળની જરૂરિયાતો અને પ્રાથમિકતાઓને ધ્યાનમાં રાખીને દેશના વિવિધ વિસ્તારોમાં અમલમાં મૂકવામાં આવી રહ્યા છે.