મુંબઈ NCB દ્વારા આંતર રાજ્ય ડ્રગ્સ તસ્કરી નેટવર્કનો પર્દાફાશ, બે વ્યક્તિની ધરપકડ , બે કાર્યવાહીમાં 1.060 કિલો ચરસ જપ્ત

મુંબઈમાં NCB આંતરરાજ્ય ડ્રગ્સ તસ્કરીના નેટવર્કનો પર્દાફાશ કરીને બે વ્યક્તિની ધરપકડ કરી છે. અલગ-અલગ બે કાર્યવાહીમાં 1.060 કિલો ચરસ ઉપરાંત મોટી માત્રામાં પ્રિસ્ક્રિપ્શન આધારિત ઓપિયોઇડ દવાઓ જપ્ત કરવામાં આવી છે.

પ્રથમ કાર્યવાહીમાં NCB મુંબઈની ટીમે 8 ઓગસ્ટે ગુજરાતથી મુંબઈ વચ્ચે દોડતી એક પેસેન્જર બસને અટકાવી હતી અને મુંબઈમાં એન. શેખ નામના વ્યક્તિની ધરપકડ કરી હતી. તેની પાસેથી કોડીન આધારિત કફ સિરપની (CBCS) 1,080 બોટલ મળી આવી હતી, જેનું કુલ વજન 108 કિલો હતું. તપાસમાં જાણવા મળ્યું કે આ પ્રતિબંધિત દવાઓ તપાસથી બચવા માટે આંતરરાજ્ય પેસેન્જર બસો મારફતે મુંબઈ, ભિવંડી અને આસપાસના વિસ્તારોમાં છૂટક વેચાણ માટે મોકલવામાં આવતી હતી.

સ્થળ પરની પૂછપરછ દરમિયાન શેખે ગુજરાત સ્થિત એક વિતરકની માહિતી આપી હતી. ત્યારબાદ NCBની ટીમ ગુજરાત પહોંચી અને લાંબી મેદાની દેખરેખ બાદ વડોદરામાં વિતરક તથા તેના ગોડાઉનને શોધી કાઢ્યું હતું. ગોડાઉનની તલાશી દરમિયાન CBCSની વધુ 13,938 બોટલ અને ટ્રામાડોલની 12,240 ટેબ્લેટ જપ્ત કરવામાં આવી હતી.

તપાસકર્તાઓને CBCSની અનેક બોટલના બેચ નંબર સાથે ચેડાં કરવામાં આવ્યા હોવાનું જાણવા મળ્યું હતું, જેથી દવાઓના ગેરમાર્ગે વળતરની માહિતી છુપાવી શકાય. NCB અધિકારીઓએ નકલી ઇન્વૉઇસ સહિત અનેક વાંધાજનક દસ્તાવેજો પણ જપ્ત કર્યા હતા. આ નકલી બિલોનો ઉપયોગ પ્રિસ્ક્રિપ્શન આધારિત નશીલી દવાઓને ગેરકાયદે રીતે અન્યત્ર પહોંચાડવા માટે કરવામાં આવતો હતો.

વધુ તપાસમાં જાણવા મળ્યું કે મહારાષ્ટ્રના થાણે જિલ્લાના ભિવંડી વિસ્તારમાં મુખ્યત્વે સક્રિય એન. શેખની અગાઉ પણ NDPS એક્ટ હેઠળ મહારાષ્ટ્ર પોલીસે ધરપકડ કરી હતી. જ્યારે ગુજરાત સ્થિત વિતરક પણ અગાઉ નોંધાયેલા NDPS કેસોમાં પોલીસને વોન્ટેડ છે.

દરમિયાન, 12 ઓગસ્ટે મળેલી ચોક્કસ બાતમીના આધારે NCB મુંબઈએ ઘાટકોપર વિસ્તારમાં એક મહિલાના મકાનમાં દરોડો પાડ્યો હતો. એ.જે. શેખ નામની મહિલાના ઘરમાંથી 1.060 કિલો ચરસ જપ્ત કરવામાં આવ્યું હતું. ચરસને ઘરના સામાન વચ્ચે છુપાવી રાખવામાં આવ્યું હતું અને સ્થાનિક સ્તરે વેચાણ માટે તાજેતરમાં જ મેળવવામાં આવ્યું હોવાનું તપાસમાં બહાર આવ્યું હતું.

પૂછપરછ દરમિયાન જાણવા મળ્યું કે ડ્રગ્સ વિરુદ્ધ ચાલી રહેલી કડક કાર્યવાહી અને આગામી તહેવારોની સિઝનને કારણે ચરસની આવકમાં ઘટાડો થયો હતો. આ સ્થિતિનો લાભ લઈ ઊંચા ભાવે ચરસ વેચવાની તક મેળવવા એ.જે. શેખ અને તેના સાગરીતોએ ચરસનો જથ્થો મેળવ્યો હતો.

NCBએ નેટવર્ક સાથે સંકળાયેલા અન્ય મુખ્ય સાગરીતોની ઓળખ કરી લીધી છે અને તેમની ધરપકડ માટે કાર્યવાહી ચાલી રહી છે.

અધિકારીઓએ જણાવ્યું કે ટ્રામાડોલ અને CBCS બંને પ્રિસ્ક્રિપ્શન આધારિત ઓપિયોઇડ દવાઓ છે અને તેનો તબીબી ઉપયોગ થાય છે. ટ્રામાડોલ સેન્ટ્રલ નર્વસ સિસ્ટમ (CNS) પર અસર કરીને દુખાવો નિયંત્રિત કરવામાં ઉપયોગી છે, પરંતુ તબીબી સલાહ વિના તેનું સેવન શ્વાસ ધીમો પડવા અને હૃદયના ધબકારા ઝડપી થવા જેવી ગંભીર અસરો સર્જી શકે છે, જે જીવલેણ પણ બની શકે છે.

CBCSનો ઉપયોગ સામાન્ય રીતે ઉધરસ અને શરદીની સારવારમાં થાય છે. તેમાં કોડીન નામનું ઓપિયોઇડ હોય છે. તેની વધુ માત્રા લેવાથી ગંભીર શ્વાસની તકલીફ, લીવર અને કિડનીને નુકસાન તથા મૃત્યુ પણ થઈ શકે છે.

બંને કેસમાં તપાસ ચાલુ છે. NCB દ્વારા સંગઠિત ડ્રગ્સ સિન્ડિકેટને તોડી પાડવા અને વારંવાર ગુનામાં સંડોવાયેલા આરોપીઓ સામે કાર્યવાહી કરવાની ઝુંબેશ અંતર્ગત આ કાર્યવાહી કરવામાં આવી છે.