અયોધ્યામાં પર આસ્થા સાથે રમત થઈ: રામ મંદિર દાન કૌભાંડ મામલે અખિલેશના જવાબ માગ્યા

નવી દિલ્હી, 10 ઓગસ્ટ (ANI): સમાજવાદી પાર્ટી (SP)ના સાંસદ અખિલેશ યાદવે સોમવારે ભારતીય જનતા પાર્ટી (BJP) પર આકરા પ્રહારો કરતાં તેને ‘મોટી લેન્ડ માફિયા પાર્ટી’ ગણાવી હતી. તેમણે સંસદમાં ચાલી રહેલા ગતિરોધ વચ્ચે કેન્દ્ર સરકારને અયોધ્યાના રામ મંદિરના દાનમાં કથિત ગેરરીતિના મામલે જવાબ આપવા માંગ કરી હતી.

સંસદમાં મડાગાંઠ અંગે પત્રકારો સાથે વાત કરતાં ઉત્તર પ્રદેશના પૂર્વ મુખ્યમંત્રી અખિલેશ યાદવે ફોરેન કોન્ટ્રિબ્યુશન (રેગ્યુલેશન) એક્ટ (FCRA) સુધારા બિલને લઈને પણ કેન્દ્ર સરકાર પર સવાલો ઉઠાવ્યા હતા.

અખિલેશે કહ્યું કે, “અમે સરકારને પૂછીએ છીએ કે લાઠીચાર્જ શા માટે કરવામાં આવ્યો, ટીયર ગેસના શેલ શા માટે છોડવામાં આવ્યા અને વીજ કરંટ શા માટે આપવામાં આવ્યો? હવે તેઓ FCRA લાવી રહ્યા છે. જ્યારે ભારત સરકાર અને BJPએ અમને ખાતરી આપી હતી કે ભારતીય નાણાં દેશની બહાર નહીં જાય.”

તેમણે આરોપ લગાવ્યો કે અનેક લોકો સત્તાવાર અને બિનસત્તાવાર રીતે મોટી રકમ ભારતની બહાર લઈ ગયા છે. અખિલેશે કહ્યું કે સરકારનો હેતુ સંસ્થાઓ પર કબજો મેળવવાનો છે અને FCRAના માધ્યમથી આ સંસ્થાઓનું નિયંત્રણ પોતાના હાથમાં લેવાના રસ્તા શોધવામાં આવી રહ્યા છે.

SP નેતાએ BJP પર વધુ આકરો પ્રહાર કરતાં કહ્યું, “BJP મૂળભૂત રીતે એક મોટી ‘લેન્ડ માફિયા’ પાર્ટી છે. જો તેમને કોઈ તળાવ કે ખાલી જમીન દેખાય તો… અયોધ્યાની પવિત્ર ધરતી પર જે રીતે આસ્થા સાથે રમત કરવામાં આવી, તે જોતાં માત્ર થોડી જ મિનિટોમાં જમીનના ભાવ આસમાને પહોંચી ગયા.”

વિપક્ષે સ્પષ્ટ કર્યું છે કે કેન્દ્રીય ગૃહમંત્રી અમિત શાહ સંસદમાં આવીને વિદ્યાર્થીઓ સામે થયેલી પોલીસ કાર્યવાહીની સાથે રામ મંદિરના દાન મામલે જવાબ નહીં આપે ત્યાં સુધી સંસદમાં ચાલી રહેલો ગતિરોધ સમાપ્ત કરવામાં આવશે નહીં.

કોંગ્રેસના મહાસચિવ અને સાંસદ કે.સી. વેણુગોપાલે પણ 20 જુલાઈના રોજ વિદ્યાર્થી પ્રદર્શનકારીઓ સામે થયેલી પોલીસ કાર્યવાહીને લઈને ગૃહમંત્રી અમિત શાહે સંસદમાં નિવેદન આપવાની માગણી દોહરાવી હતી. સત્તાપક્ષ અને વિપક્ષ વચ્ચેના ગતિરોધને કારણે સંસદના બંને ગૃહોની કાર્યવાહી બપોરે 12 વાગ્યા સુધી સ્થગિત કરવામાં આવી હતી.

સંસદની બહાર પત્રકારો સાથે વાત કરતાં વેણુગોપાલે કહ્યું કે અમિત શાહ ગૃહમાં નિવેદન આપે નહીં ત્યાં સુધી કોંગ્રેસ સંસદમાં ચાલી રહેલો ગતિરોધ સમાપ્ત નહીં કરે. તેમણે કહ્યું, “અમારું વલણ એકદમ સ્પષ્ટ છે. ગૃહમંત્રી અમિત શાહે સંસદમાં આવીને દિલ્હીના વિદ્યાર્થીઓ સાથે થયેલા અત્યાચાર અંગે નિવેદન આપવું જોઈએ. આ અમારી સ્પષ્ટ માગ છે. આ મુદ્દે નિવેદન આવ્યા વિના અમે તેમને આગળ વધવા નહીં દઈએ.” દરમિયાન, સંસદમાં ચાલી રહેલા ગતિરોધ વચ્ચે કેન્દ્ર સરકાર આજે અનેક મહત્વપૂર્ણ બિલ રજૂ કરે તેવી શક્યતા છે. તેમાં ટ્રિબ્યુનલ્સ રિફોર્મ્સ બિલ, 2026, માઇન્સ એન્ડ મિનરલ્સ (ડેવલપમેન્ટ એન્ડ રેગ્યુલેશન) એમેન્ડમેન્ટ બિલ, 2026, કેરળ (નામમાં ફેરફાર) બિલ, 2026 અને નેશનલ કો-ઓપરેટિવ ડેવલપમેન્ટ કોર્પોરેશન (એમેન્ડમેન્ટ) બિલ, 2026નો સમાવેશ થાય છે. જોકે, INDIA ગઠબંધન પોતાની માગ પર અડગ છે.