બલૂચિસ્તાનમાં ચુસ્ત સુરક્ષા વચ્ચે બજારો અને રસ્તાઓ બંધ કરાયા

બસ અને રેલ સેવાઓ ખોરવાતાં હાલાકી

ક્વેટા: પાકિસ્તાનના અશાંત પ્રાંત બલૂચિસ્તાનના અનેક જિલ્લાઓમાં સુરક્ષા વ્યવસ્થા અત્યંત કડક કરી દેવામાં આવતાં મંગળવારે બજારો, વેપારી મથકો અને મુખ્ય માર્ગો સંપૂર્ણપણે બંધ રહ્યા હતા. સૈન્ય અને પાકિસ્તાની દળોની ભારે તૈનાતી વચ્ચે બસ ઓપરેટરોએ ત્રણ દિવસ માટે સેવાઓ સ્થગિત કરવાની જાહેરાત કરી છે, જ્યારે રેલવે સત્તાવાળાઓએ પેસેન્જર ટ્રેનના રૂટ ટૂંકાવી દીધા છે. આ સ્થિતિના કારણે સમગ્ર પ્રદેશમાં સામાન્ય જનજીવન અસ્તવ્યસ્ત થઈ ગયું છે.

અનેક શહેરોમાં કરફ્યુ જેવો સન્નાટો
‘ધ બલૂચિસ્તાન પોસ્ટ’ (TBP) ના અહેવાલ મુજબ, નોશ્કીમાં મુખ્ય બજાર તેમજ શહેરના પ્રવેશ અને નિકાસ માર્ગો બંધ કરી દેવામાં આવ્યા હતા, જ્યાં મોટા પ્રમાણમાં લશ્કરી દળો તૈનાત કરાયા છે. સ્થાનિક લોકોએ સ્થિતિને કરફ્યુ જેવી ગણાવી હતી. પંંજગૂરમાં પાકિસ્તાની દળોએ દુકાનદારોને બજારમાં પ્રવેશતા અટકાવતાં ચિતકન બજાર સહિતના વાણિજ્યિક વિસ્તારો ઠપ થઈ ગયા હતા. તુર્બત, નાસિરાબાદ અને ક્વેટામાં પણ કન્ટેનરો અને બેરિકેડ્સ મૂકીને રેડ ઝોન તરફ જતા મુખ્ય રસ્તાઓ બ્લોક કરી દેવાયા હતા.

બસ અને રેલ સેવાઓ પર માળખાકીય ફટકો
સુરક્ષાની ચિંતાઓને ટાંકીને ટ્રાન્સપોર્ટ યુનિયને કરાચીથી તુર્બત અને ગ્વાદર વચ્ચે દોડતી બસ સેવાઓ ૧૩ ઓગસ્ટથી ૧૫ ઓગસ્ટ સુધી ત્રણ દિવસ માટે સ્થગિત કરવાની જાહેરાત કરી છે, જેને ૧૬ ઓગસ્ટે પુનઃશરૂ કરવાનો અંદાજ છે. બીજી તરફ, પેશાવરથી ક્વેટા જતી 'જાફર એક્સપ્રેસ' ટ્રેનને ક્વેટા સુધી મોકલવાને બદલે જેકોબાબાદ ખાતે જ રોકી દેવામાં આવી હતી, જેથી બલૂચિસ્તાનની રાજધાની તરફ મુસાફરી કરતા મુસાફરોને ભારે મુશ્કેલીઓનો સામનો કરવો પડ્યો હતો.

જનજીવન અને વેપાર-રોજગાર ઠપ
પ્રાંતના ઘણા હાઇવે પર ખાડા ખોદીને રસ્તાઓ બંધ કરી દેવાયા હોવાના અહેવાલો પણ સાંપડ્યા છે. સ્થાનિક નાગરિકોના જણાવ્યા મુજબ, કડક સુરક્ષા અને મુવમેન્ટ પર લાદવામાં આવેલા પ્રતિબંધોના કારણે લોકો ઘરોમાં કેદ રહેવા મજબૂર બન્યા છે. મીડિયા અહેવાલ અને સૂત્રો દ્વારા મળતી માહિતી મુજબ, વેપાર-ધંધા અને વાણિજ્યિક પ્રવૃત્તિઓ સંપૂર્ણ રીતે અટકી જતાં પ્રદેશની આર્થિક સ્થિતિ પર પણ ભારે માતબર પ્રતિકૂળ અસર પડી રહી છે.