ત્રિપક્ષીય મક્કા સંયુક્ત સંરક્ષણ કરાર સામે ઈરાન લાલઘૂમ થયું

કાગળના ટુકડાથી સુરક્ષા નહીં મળે, પશ્ચિમ એશિયામાં ભારે તણાવ વધ્યો

તેહરાન:પશ્ચિમ એશિયામાં વધી રહેલા ભારે સૈન્ય તણાવ વચ્ચે સાઉદી અરેબિયા, પાકિસ્તાન અને તુર્કીયે વચ્ચે સ્થાપિત થયેલા નવા સૈન્ય ગઠબંધનને લઈને ઈરાને અત્યંત આકરું વલણ અપનાવ્યું છે. તાજેતરમાં આ ત્રણેય દેશો વચ્ચે થયેલા મક્કા સંયુક્ત સંરક્ષણ કરારની ઈરાને સખત શબ્દોમાં ટીકા કરી છે. સાઉદી અરેબિયાને ખુલ્લી ધમકી આપતા ઈરાની નેતાઓએ જણાવ્યું છે કે આવા કાગળના ટુકડાથી ક્યારેય સાચી સુરક્ષા મળી શકતી નથી. આ નિવેદન બાદ સમગ્ર પ્રદેશમાં ભૂ-રાજકીય ગરમાવો વધી ગયો છે.

ત્રિપક્ષીય સૈન્ય ગઠબંધનનું માળખું
સાઉદી અરેબિયાના ક્રાઉન પ્રિન્સ, તુર્કીયેના રાષ્ટ્રપતિ અને પાકિસ્તાનના વડાપ્રધાન વચ્ચે યોજાયેલી ઉચ્ચ સ્તરીય બેઠક દરમિયાન આ ઐતિહાસિક કરારને આખરી ઓપ આપવામાં આવ્યો હતો. આ કરારની મુખ્ય શરત મુજબ, ત્રણેય દેશોમાંથી કોઈપણ એક રાષ્ટ્ર પર થનારો સૈન્ય હુમલો ત્રણેય દેશો પર થયેલો હુમલો ગણાશે. પોતાની મહત્વપૂર્ણ તેલ સુવિધાઓ અને સરહદોને સુરક્ષિત કરવા માટે સાઉદી અરેબિયા હવે અમેરિકા ઉપરાંત અન્ય મુસ્લિમ દેશો સાથે પોતાની લશ્કરી તાકાત મજબૂત કરી રહ્યું છે.

ઈરાનનો આકરો પ્રહાર અને ચેતવણી
કરાર સામે વિરોધ નોંધાવતા ઈરાની સંસદની રાષ્ટ્રીય સુરક્ષા સમિતિના વરિષ્ઠ સભ્ય ઈબ્રાહિમ રેઝાઈએ સોશિયલ મીડિયા પર પોતાની ભડાસ કાઢી હતી. તેમણે સ્પષ્ટ જણાવ્યું હતું કે ભૂતકાળમાં અમેરિકા તરફનો અતિશય ઝુકાવ પણ સાઉદી અરેબિયાને સુરક્ષા આપી શક્યો નથી. જો સાઉદી પોતાની વિદેશ નીતિમાં યોગ્ય સુધારો કરે, તો તેમણે બીજા દેશો પાસે સુરક્ષા માટે આજીજી કરવાની ક્યારેય જરૂર પડશે નહીં.

પ્રાદેશિક સુરક્ષા પર ગંભીર અસરો
મીડિયા અહેવાલ મુજબ, અમેરિકા અને ઈરાન વચ્ચે ચાલી રહેલા સંઘર્ષને કારણે રાતા સમુદ્ર અને હોર્મુઝની સમુદ્રધુનીમાં જહાજોની અવરજવર પર માઠી અસર પડી છે. સ્થાનિક સુરક્ષા વ્યવસ્થાને મજબૂત કરવાના નામે રચાયેલું આ નવું ગઠબંધન ખાડી દેશો માટે નવો બદલાવ લાવી શકે છે. સૂત્રો દ્વારા મળતી માહિતી મુજબ, ઈરાનની આ કડક ચેતવણી બાદ પશ્ચિમ એશિયામાં ભવિષ્યમાં વધુ મોટો વિવાદ અને સંઘર્ષ છેડાય તેવી પૂરેપૂરી શક્યતા સેવાઈ રહી છે.