ગ્રીસમાં જંગલની આગ ઓલવતા બે હેલિકોપ્ટર ટકરાયા

ગ્રીસ હેલિકોપ્ટર દુર્ઘટનામાં એક પાયલટનું થયું મોત

એથેન્સ: ગ્રીસની રાજધાની એથેન્સના પશ્ચિમમાં આવેલા સાઈથા વિસ્તારમાં જંગલની ભયાનક આગ ઓલવવાની કામગીરી ચાલી રહી હતી ત્યારે બે અગ્નિશામક હેલિકોપ્ટર હવામાં સામસામે ટકરાઈ જતાં ગંભીર અકસ્માત સર્જાયો હતો, જેમાં એક પાયલટનું દુઃખદ મોત નીપજ્યું છે અને અન્ય ક્રૂ સભ્યો ગંભીર રીતે ઘાયલ થયા છે.

ઘટનાની જાણ થતાં જ સેના અને ફાયર બ્રિગેડ દ્વારા તાત્કાલિક ધોરણે મોટા પાયે બચાવ અભિયાન શરૂ કરવામાં આવ્યું હતું. મીડિયા અહેવાલ અનુસાર, અકસ્માત બાદ બચાવ ટુકડીને ઘાયલ ક્રૂ સભ્યો એક ઊંડી ખાઈમાંથી મળી આવ્યા હતા, જેને ત્વરિત સારવાર માટે નજીકની મિલિટરી હોસ્પિટલમાં દાખલ કરવામાં આવ્યા છે જ્યાં તેમની સારવાર ચાલી રહી છે. શુક્રવારથી સતત સળગી રહેલી આ આગ ભારે પવનના કારણે ખૂબ જ ઝડપથી ફેલાઈ રહી હતી, જેને કાબૂમાં લેવા માટે આકાશમાંથી પાણીનો છંટકાવ કરવામાં આવી રહ્યો હતો.

ટકરાયેલા બંને હેલિકોપ્ટર બેલ મોડેલના હતા અને એક જ વિસ્તારમાં આગ ઓલવવા માટે પાણીનો છંટકાવ કરી રહ્યા હતા. જંગલમાં ચારેય તરફ ફેલાયેલો ઘાટો ધુમાડો, ઓછી વિઝિબિલિટી અને કલાકના વિષમ પવનના કારણે પાયલટો માટે હેલિકોપ્ટર નિયંત્રિત કરવું અત્યંત મુશ્કેલ બની ગયું હતું, જેના પરિણામે આ મિડ-એર કોલિઝન સર્જાયું હોવાનું પ્રાથમિક તપાસમાં બહાર આવ્યું છે.

વ્યાપક અસર અને આગનું જોખમ

આ ભીષણ આગ એટલી હદે વકરી હતી કે અટિકા વિસ્તારના અનેક ગામડાઓમાંથી નાગરિકોને સુરક્ષિત સ્થળે ખસેડવાની ફરજ પડી હતી. સ્થાનિક પ્રશાસન દ્વારા આગ પર કાબૂ મેળવવા માટેના તમામ પ્રયાસો યુદ્ધના ધોરણે ચાલુ છે, પરંતુ ખરાબ હવામાન અને ધુમાડાને કારણે રાહત કામગીરીમાં સતત અડચણો ઊભી થઈ રહી છે.