કેનેડાના બ્રિટિશ કોલંબિયામાં ભીષણ જંગલની આગ: 20 હજારથી વધુ લોકોને સ્થળાંતર કરાવાયું

ઓટાવા,: કેનેડાના પશ્ચિમ વિસ્તારમાં બ્રિટિશ કોલંબિયાના ઓકાનાગન સરોવરના કિનારે આવેલા નગરો તરફ ઝડપથી ફેલાતી જંગલની આગને પગલે રાતોરાત 20 હજારથી વધુ લોકોને સલામત સ્થળે ખસેડવામાં આવ્યા છે. આગને કારણે અનેક માળખાં અને ઇમારતોને નુકસાન પહોંચ્યું હોવાનું સામે આવ્યું છે.

CNNના અહેવાલ મુજબ, વહીવટીતંત્રે આશરે 12 હજારની વસ્તી ધરાવતા સમરલેન્ડ શહેરના સમગ્ર વિસ્તાર માટે સ્થળાંતરનો આદેશ આપ્યો છે. આ ઉપરાંત પાડોશી પીચલેન્ડ અને તેની આસપાસના વિસ્તારોમાં રહેતા આશરે 8 હજાર લોકોને પણ સ્થળાંતર કરાવવામાં આવ્યા છે. મિલકતોને થયેલા કુલ નુકસાનનું મૂલ્યાંકન હજુ ચાલી રહ્યું છે.

બાલ્ડ રેન્જ વાઇલ્ડફાયરની જાણ શુક્રવારે સાંજે થઈ હતી અને ગણતરીના કલાકોમાં આગ આશરે 50 ચોરસ કિલોમીટર વિસ્તારમાં ફેલાઈ ગઈ હતી. આગે સૌપ્રથમ નાના ફોલ્ડર સમુદાયને પોતાની ઝપેટમાં લીધો હતો અને ત્યારબાદ માત્ર આશરે 15 કિલોમીટરનું અંતર કાપીને અત્યંત ઝડપથી સમરલેન્ડ તરફ આગળ વધી હતી.

આ વિકટ સ્થિતિ વચ્ચે કેનેડાના વડાપ્રધાન માર્ક કાર્નીએ બ્રિટિશ કોલંબિયાની સરકારને કેન્દ્ર સરકાર તરફથી સંપૂર્ણ સહયોગ આપવાની ખાતરી આપી છે. ફેડરલ ઇમરજન્સી મેનેજમેન્ટ અધિકારીઓ પણ પ્રાંતીય તંત્ર સાથે મળીને રાહત અને બચાવ કામગીરીમાં સંકલન કરી રહ્યા છે.

કાર્નીએ સોશિયલ મીડિયા પ્લેટફોર્મ ‘એક્સ’ પર જણાવ્યું કે સમરલેન્ડમાં હજારો લોકોને ભીષણ આગના કારણે સ્થળાંતર કરવું પડ્યું છે. તેમણે આગ સામે લડી રહેલા ફાયરફાઇટર્સ અને અન્ય ઇમરજન્સી કર્મચારીઓની કામગીરીની પ્રશંસા કરી હતી.

તેમણે કહ્યું કે બ્રિટિશ કોલંબિયા સરકારને મદદ કરવા માટે ફેડરલ સરકાર સંપૂર્ણપણે તૈયાર છે અને આગના કારણે ઘર છોડવા મજબૂર થયેલા લોકોની સલામત વાપસી માટે આશા વ્યક્ત કરી હતી. કાર્નીએ વધુમાં જણાવ્યું કે પ્રાંતના વિવિધ વિસ્તારોમાં ઘર અને સમુદાય છોડવા મજબૂર થયેલા લોકોને મદદ કરવા માટે કેન્દ્ર સરકાર બ્રિટિશ કોલંબિયા સાથે મળીને કામ કરી રહી છે. તેમણે અસરગ્રસ્ત લોકો તેમજ આગની આગળની હરોળમાં ફરજ બજાવી રહેલા ફાયરફાઇટર્સ અને ઇમરજન્સી કર્મચારીઓ પ્રત્યે એકતાનો સંદેશ આપ્યો હતો.