સિસિલિમાં માઉન્ટ એટના જ્વાળામુખી ફાટ્યો અચાનક

ઈટાલીના સિસિલી ટાપુ પર ઇમર્જન્સી સ્થિતિ

રોમ: ઈટાલીના સિસિલી ટાપુના પૂર્વ કિનારે આવેલો વિશ્વનો સૌથી વધુ સક્રિય અને ૯,૦૨૨ ફીટ ઊંચો ‘માઉન્ટ એટના’ જ્વાળામુખી સોમવારે સવારે અચાનક ફાટ્યો હતો. જ્વાળામુખીમાંથી નીકળેલા રાખ અને ધૂમાડાના વિશાળ ગોટા આકાશમાં ફેલાઈ જતાં હવાઈ વાહનવ્યવહાર પર ગંભીર અસર પડી છે. અગમચેતીના ભાગરૂપે અને ફ્લાઇટ્સ માટે જોખમ ઊભું થતાં નજીકમાં આવેલું કેટાનિયા એરપોર્ટ તાત્કાલિક અસરથી બંધ કરી દેવામાં આવ્યું છે.

એરપોર્ટ બંધ કરાયું અને યાત્રીઓને પરત મોકલાયા
સિસિલી ટાપુના મુખ્ય અને ઈટાલીના સૌથી વ્યસ્ત એરપોર્ટ પૈકીના એક એવા કેટાનિયા એરપોર્ટ પર જ્વાળામુખીની રાખ ઉડવાને કારણે દ્રશ્યતા ઘટી ગઈ હતી. ફ્લાઇટ્સનું ટેક-ઓફ અને લેન્ડિંગ જોખમી બનતાં એરપોર્ટ ઓથોરિટીએ તમામ સેવાઓ સ્થગિત કરી દીધી હતી. એરપોર્ટ પર આવી પહોંચેલા હજારો મુસાફરોને સાવચેતીના પગલારૂપે પોતપોતાના ઘરે કે સુરક્ષિત સ્થળે પરત રવાના કરી દેવાયા હતા.

લાવારસ વહેવાની શક્યતા અને તંત્રની તૈયારીઓ
માઉન્ટ એટના વારંવાર ફાટવા માટે જાણીતો છે અને તેમાંથી નીકળતો ગરમ લાવારસ આસપાસના ખેતીવાડી અને રહેણાંક વિસ્તારોને નુકસાન પહોંચાડે છે. જ્વાળામુખી એરપોર્ટની નજીક જ હોવાથી જો લાવારસ તે તરફ ધસી આવે તો મોટી હોનારત સર્જાઈ શકે છે. જોકે હાલમાં તેવી સ્થિતિ સર્જાઈ નથી, પરંતુ સ્થાનિક સરકારે સ્થિતિ પર ચાંપતી નજર રાખીને બચાવ કામગીરી માટે પૂર્વતૈયારીઓ શરૂ કરી દીધી છે.

પરિસ્થિતિ પર ચાંપતી નજર
સરકારી સાધનો અને ઈટાલીના આપત્તિ વ્યવસ્થાપન વિભાગ દ્વારા સમગ્ર પરિસ્થિતિ પર સતત નજર રાખવામાં આવી રહી છે. મીડિયા અહેવાલ અને સૂત્રો દ્વારા મળતી માહિતી મુજબ, જો જ્વાળામુખીમાંથી વધુ રાખ અને ગરમ લાવા નીકળશે તો બચાવ ટુકડીઓને તાત્કાલિક તૈનાત કરવામાં આવશે. સ્થાનિક લોકોને પણ જ્વાળામુખી ક્ષેત્રથી દૂર રહેવા અને તંત્રની સૂચનાઓનું પાલન કરવા જણાવાયું છે.